Jimmy on Re:spect #1

Yo！大家好，小弟初次投稿到Respect，以後多多指教，我會係度分享我嘅音樂點滴比大家知！介紹番，我係Jimmy來自二人電子組合Fabel，其實我日常做幕後嘅工作比較多，對住部電腦仲多過對人，最近當然就係忙緊宣傳新歌《上傳狂》。

之前分別推出「電子三部曲」之後，呢首新歌《上傳狂》算係Fabel回歸最初出道嘅時候，比較多搖滾元素嘅曲風。除左捨棄電子鼓beat用真鼓取代之外，仲有大量使用distortion電子聲，Hip-hop Sampling同埋難得嘅合唱團人聲，當然都有我自己一直喜愛嘅電影音樂元素係裡面。

講下最近得閒做乜？無呀我就煲下Game of Throne咁囉，用左一個月追番晒六季，睇到爆肝都繼續追，除左呢套其實仲等緊十月出嘅第二季Stranger Things。我一直認為呢套復古８０年代背景嘅科幻劇係其中一個重要推動復古音樂熱潮嘅原因之一，聽一聽主題音樂就Feel到果陣８０’s電子合成器嘅味道，由一隊專玩電子合成器嘅樂隊Survive創作。唔好講話電視劇，連Marvel都會用復古音樂去包裝，睇下Guardians of the Galaxy大受歡迎就知，我認為呢個復古熱潮岩岩先開始進入高潮。我相信除左Bruno Mars, The Weeknd, Lana Del Rey等等之外，要搵復古野聽其實真係有好多選擇！下期再介紹～

版權為 Re:spect Music Magazine 紙談音樂 所擁有