Jimmy On Re:spect #8

2017年就快又完啦！最近跟幾個唔同嘅音樂友人傾計，研究下2017年下半年全球流行音樂文化嘅走勢發展，大家都不約而同覺得下半年開始無乜”新”音樂聽。新音樂當然唔止而家無人推出新歌，而係大家好似聽聽下覺得無乜野好聽，首首歌都好似差唔多FEEL，比唔到人新嘅衝擊，就好似全世界都停左步伐，打開電台歌單聽到嘅都係差別不大嘅音樂。不過係呢度輕輕回顧一下自己今年係聽歌上嘅取向。

＝＝＝＝＝＝＝＝＝＝＝＝＝＝
歡迎加 instagram：jimmy__fung
有乜野想分享其實可以黎留言或者ＰＭ，一齊交流下！

【植入式廣告】Fabel都開左Instagram 賬戶，大家歡迎Follow。
instagram：fabeltheband
＝＝＝＝＝＝＝＝＝＝＝＝＝＝

由上年年尾一直到今年一直都有留意不同嘅復古系音樂元素發展，上年開始認識Vaporwave以來，一直都有研究同果方面有關嘅影像同聲音。Retrowave算係一個比較成型嘅新風潮，Retro原意指復古，Wave當然就係浪潮，Retrowave慢慢就變成現今將80年代重新組合嘅名稱。早係上兩年一部經典Cult片 “Kung Fury” 內裡嘅配樂就係呢一個風格嘅代表之一，另外今年最近再推出Stranger Things 2，劇中不論原創配樂或是歌曲都是充滿80年代情懷，銀河守護隊嘅經典Mixtape一樣係另到呢一種復古風潮不斷延續，成為有力支持。The Weeknd同Daft Punk上年合作推出嘅兩首歌都有呢種影子，一直都今年都仲係無OUT過。上半年一直都有Loop呢種style嘅歌，甚至曾經蔓延到不斷搵番真實80年嘅流行曲去聽，驚嘆當年嘅電子風味真係好特別，特別係電子合成器係一個新發明品嘅時候，大家都會將佢好好咁用唔同手法利用係唔同層面上，香港當年都跟貼國際視野，追上呢股電子風潮，達明Raidas梅姐校長等等不同樂隊歌手無一例外。

去到年中嘅時候，開始重新留意自己一直都有關注開嘅Futurebass同埋Tropical House身上，前者相信已經慢慢成為各大流行音樂中嘅常用元素之一，最易表達Futurebass嘅元素之一就係Wobblesynth同埋Sidechain嘅運用，比較容易理解嘅例子就係Chainsmoker經常使用嘅果種風格，今年同Coldplay合作果首歌真係全世界都聽到。玩Futurebass比較”正宗”嘅單位大部份都係Indie為主，拿帶番個頭盔先，”正宗”只係一個主觀嘅概念，唔代表非正宗嘅就有問題或者差劣過正宗嘅。Tropical House其實都只係因為有一兩個巨頭支撐住整個風格，不過呢個風格就有多元素散落左係流行音樂裡面，重點都係通常帶有一陣熱帶味，拉丁或加勒比海類型嘅有音或無音調敲擊樂器運用，我有留意開又比較著名嘅代表就係Kygo同埋Cash Cash，Justin Bieber對上一隻大碟Purpose都有幾首有呢個元素嘅。

去到年尾嘅時候，就係講番開文章開段嘅事情啦，喂今年仲有乜野好聽? 又帶多個頭盔先，我同友人們都係電子音樂界，又或者係RnB/Hiphop界別傾向，所以文中內容有少少主觀偏好嘅。無錯今年Hiphop係中國係香港係有快速成長嘅跡象，特別係當我見到某運動牌子會搵香港Indie Hiphop界嘅人做代言嘅時候，我感覺到呢股力量應該會繼續發展。但您話Hiphop呀Trap呀都已經講緊係2013年開始嘅事，今年冒起嘅Hiphop風潮其實都係遲來的春天而已。我仲依稀記得小弟中學時期，流行榜上嘅歌唔係Hiphop就係Rock又或者Punk嘅年代，心諗而家幾時先會係側重電子音樂嘅天秤由一邊調番到另一邊呢? 不過我會繼續懷住好奇心，睇下2018年有乜野新音樂衝擊影響大家。

 
一篇實體文章有時唔容易打晒歌名或者音樂單位嘅名字出黎。
呢度有個QR CODE可以俾大家追蹤我聽緊乜歌，同埋我都會分享下Songlist。

版權為 Re:spect Music Magazine 紙談音樂 所擁有