Jimmy On Re:spect #7

最近自己就係忙緊宣傳Fabel新碟「SH叫T」，其實分別係 ”SHOUT” 同埋 ”叫”嘅中英混合版本名稱。碟內嘅８首歌都記錄住我地呢四年對身邊呢個社會發生嘅事，或者係身邊嘅人發生嘅事，係音樂上有一個總結。音樂人樂隊同歌手始終都會對出大碟有一個情意結，即使知道呢個時代下數碼音樂嘅影響力輕易超過實體專輯，實體唱片可以播放嘅機會只係停留係屋企或者係汽車之中，但實體唱片對音樂界一直以來嘅代表性實在不能改變，就好似音樂人嘅一張身分證，一張屬於我地嘅卡片，甚至會用心血結晶品黎形容！

呢張用左４年時間經歷，創作，製作，最後除左音樂，仲設計埋視覺元素，將我地Fabel一直以黎嘅美學價值觀融合係呢張新專輯「SH叫T」。除左有我同Lolo辛苦一點一滴嘅心血，仲有我地老闆Alvin Leong，一直合作嘅作詞人Ben鍾銘熙背後一直嘅支持合作。全碟混師音Simon Li，曾經合作過嘅錄音師Amic，Ming，沁怡，Thomas等等，每一個人嘅參與對製作一張專輯黎講都非常重要。我係一個視覺上面比較差嘅人，所以除左Lolo今次有份設計大碟封面，仲要多謝插畫家Caxton同我地一齊開啟Vaporwave視覺路線，同埋HoYin係專輯設計上一直嘅支援。

四年前「We Are One」用暗黑嘅色調配合搖滾和電子元素開始Fabel的音樂路，四年後「SH叫T」就加入暗紫色調揉合不同種類嘅電子音樂紀錄呢四年我地嘅故事，大家經過ＣＤ鋪不妨留意下啦！

版權為 Re:spect Music Magazine 紙談音樂 所擁有