Jimmy On Re:spect #6

上期講到９０時代嘅音樂文化，今集就繼續介紹下令自己著迷嘅９０年代音樂。

果陣分別有幾種音樂風格發酵蘊釀，首先講講HipHop界最令我印象深刻嘅就係House Of Pain嘅 <<Jump Around>>，我係英國留學果陣基本上每幾晚就會係Club聽到DJ播呢一首歌，有時候未必會播原裝歌曲，而係會播呢首歌嘅Beat，之後係呢個Beat上面由唔同嘅演繹者唱出唔同嘅野，呢種就係Sampling嘅其中一種手法，呢個Beat相信係HipHop界其中一首經典嘅例子。Hiphop不單止係９０年代一個成長得好快嘅風格，而且仲同電子音樂衍生左其他新嘅風格，好似Trip-Hop就係其中一種，亦都係其中一種最影響我音樂歷程嘅風格之一。

Trip-Hop採用受Hip-Hop薰陶嘅拍子同聲質，再加入電子合成器同埋陰沉迷幻嘅人聲揉合而成。英國當年有３隊好出名嘅「Trip-Hop」３巨頭，Portishead，Massive Attack同埋Tricky，其中Massive Attack將會係今年Clockenflap出現，本人都相當期待。

另外９０年代尾係香港出現嘅Wave Party文化，以致香港樂壇出現快歌熱潮，都係因為由於當年Euro Dance嘅誕生，Haddaway嘅 <<What Is Love>> 應該係呢個風格第一首爆紅嘅歌曲，之後當然唔駛講有香港人好熟識嘅 <<Butterfly>>, <<Barbie Girl>>等等，本地當然有《花花宇宙》《獨家試唱》《全日愛》呢堆電子快歌，歌手Cher１９９８年嘅 <<Believe>> 就係用Auto-Tune嘅始祖！

之後當然要講講英倫搖滾，雖然自己唔係百分百死忠，不過當年Brit-rock, Brit-pop的確係好輝煌嘅年代，只係講Oasis, The Verve, Blur, U2等等之後已經唔駛要多講，相傳話Britrock嘅出現係某程度上代表左英國中下階層嘅聲音同生活點滴，不過令我佩服嘅係點解可以將代表一個地方嘅聲音慢慢感染到全世界，變成全世界嘅集體回憶。

仲有一個幾特別嘅例子要講，當年係香港係亞洲紅遍天下嘅 <<Lemon Tree>> , <<Miss You Finally>>, <<That’s Why (You Go Away)>>等等神曲，分別都係來自德國嘅Fool’s Garden同埋Trademark仲有丹麥嘅Michael Learns to Rock，佢地係亞洲嘅名氣大大遠超佢地係當地嘅影響力，當年互聯網並唔發達，可能佢地嘅Publishing公司係亞洲嘅Marketing做得太好？定只係純粹巧合就不得而之了。

以上所提及嘅樂隊歌手同歌曲只係冰山一角，９０年代出現嘅新音樂風格並唔止咁少，仲有New Age呢種好重要嘅風格仲未講，雖然而家嘅New Age已經唔係形容音樂風格咁簡單。真係講唔晒咁多，下期待續。

附上小弟仿９０年代玩味照一幅。

版權為 Re:spect Music Magazine 紙談音樂 所擁有