Jimmy on Re:spect #5

最近講起９０時代被復古嘅潮流慢慢出現，不論係聽覺或者係視覺上都有跡可尋。我就係度分享下自己９０年代嘅音樂回憶，趕上８０後上最後一班尾班車，其實９０年代係我心目中所有野都係我童年回憶嘅一部份，亦都見證著時代嘅轉變，自己嘅成長。

其實我第一次接觸音樂係透過錄音帶，我屋企人播番許冠傑嘅金曲精選，有時又會用ＣＤ機播下西洋老歌。睇黎我細個果陣對音樂都有番咁上下熱情，小學嘅時候就已經用零用錢買碟，果陣第一隻買左陳慧琳嘅《誰願放手》精選，第二隻就係買左盧巧音嘅《喜歡戀愛》精選。除左買ＣＤ之外其實果陣曾經流行過一樣野，叫做ＭＤ！類係係微型版ＣＤ，每隻ＭＤ都可以由自己決定揀咩歌放落去，就好似電影「銀河守護隊」裡面嘅Awesome Mix一樣，製作一隻完全屬於自己口味嘅專輯。

不過講起真正重新認識９０年代嘅電影同音樂就反而係中學畢業之後，開始修讀音樂製作嘅過程裡面，重新去認識當年嘅歌，慢慢用欣賞同思考嘅角度去睇當年港產片嘅拍攝風格同內容，繼而慢慢將眼光由香港放到其他地方。下期重點分享一下我眼中９０年代嘅模樣。

同埋留意我地嘅新專輯，好快就會面世啦！仲有就係Fabel嘅新歌《叫》已經出左ＭＶ，大家可以Scan QR code入去聽。

版權為 Re:spect Music Magazine 紙談音樂 所擁有