Jimmy on Re:spect #4

Fabel黎緊推出大碟，將會係2013年出道之後第二張音樂專輯。都係果句，今時今日出碟都唔會係為左搵錢，因為大家都知擺明係蝕嫁啦，但係出碟就係好似一個象徵，對音樂人就係一個里程碑，一個目標，一個結晶品。始終有一件實體物件係手，一定好過網上虛擬音樂庫，您睇下呢幾年黑膠碟復活就知啦！

呢一張專輯名字已經定好左，同黎緊果首新歌一樣都係叫做《叫》。係香港呢個彈丸之地，七百萬人都一樣缺乏空間，而對社會工作嘅壓力，日常生活又搵唔到出口宣洩，我地每個人都需要叫，需要大叫發洩一下，需要大叫去對抗無力感，話比人聽自己嘅存在。呢張專輯其實係抒發我地呢幾年對身邊環境嘅感受同體會。

由《自戀自在》開始，我地認為每個人嘅價值都係由自己決定，而唔係由人地去決定。《夢花鏡影》就係講緊我地一直只會回望過去，只會諗起昔日香港嘅美好，但係就無珍惜過而家我地擁有嘅野，有時候我地應該活在當下，多Ｄ關心物邊嘅人同事。《困獸都市》就係講緊每個人由出世開始之後，就好似入左一個監獄裡面，由讀書到出社會返工，由儲錢買樓去到組織家庭，隨住我地成長打破一個又一個嘅囚牢，永遠沒有終結，我地嘅生命從誕生一刻開始就無自由無自主，註定成為社會嘅一粒鏍絲釘。《安多酚》就想表達上癮有幾可怕，令自己上癮嘅唔一定係毒品，可以係一個人，一種食物，一個行為，但其實只要您對一年事情上癮，呢件事對自己黎講就可能係一種毒品，特別係不能自拔不能自控嘅時候。《上傳狂》就係更明顯啦，我地每個人每日都係手機不離手，９成時間都係係社交平台上面打滾流浪，每日生活點滴都會上傳上網分享，期待有人留意有人比LIKE，有時候會心諗，我究竟係為左上傳比人睇而生存，定係真係為緊自己生存，雖然我係社交平台上面唔係最活躍嘅一群，不過我都會將唔少嘅注意力放落去，不竟活係呢個年代都要緊下潮流啦，唔係點出去同人吹水呢。

唔經唔覺係到暴露左張專輯嘅歌單添，呢隻專輯會比上一隻ＥＰ電子味重，反而會減少番搖滾嘅味道，都時出左我再「上傳」番張專輯相係度啦！今次就先放《叫》嘅單曲照係度先。

版權為 Re:spect Music Magazine 紙談音樂 所擁有