Jimmy on Re:spect #3

如無意外九月下旬就應該聽到Fabel最新嘅作品《叫》。之前都有講過最近潮流興復古，我地呢首新歌《叫》就嘗試加入唔同嘅復古元素。可能大家都仲諗緊復古黎黎去去咪又係玩八十年代風格，其實計一計數，而家黎９０年代都唔近啦，９０年代絕對有潛質係時候「被復古」。

９０年代音樂最令我記得嘅元素：分別有好大回音好濛嘅主音、有嘻哈元素嘅拍子、藍調味嘅ＥＰ、黑膠捽碟聲效…於是我就將呢幾種元素放入《叫》裡面，當然同時亦都搵下流行電音元素揉合一下，最特別都係投入人聲樣本 ”Vocal Sampling” 作為編曲一部份。Fabel近期嘅作品都會出現呢種玩法，最主要係世界潮流嘅帶領之下，幾乎所有曲風都有出現呢一種Vocal Sampling嘅元素。

諗起拍《叫》MV嘅時候，有好多辛酸搞笑新奇事，最難忘就一定係比人用粗口鬧！《叫》顧名思異MV裡面我地係需要大叫嘅，係一個人口稠密人來人往嘅街上面大叫，自然就會嚇親路人，所以就係咁被幾位叔叔鬧左下，唯有笑笑口講唔好意思。其次就係今次嘅MV好有劇情性，需要租借一間茶餐廳拍攝，Lolo做顧客我就做二廚，第一次真身走入茶記後面嘅水吧位置，感覺新奇！

版權為 Re:spect Music Magazine 紙談音樂 所擁有